Psa 102 | WNC | STEP | Buyambam tapa, nata tumuk wamu gae yawa natapso. Gata gatangamiyakge natake gae yanggat taknga natangamuyo.

Psalms 102

Kau aaknga aminu tapatuta meya buyambam pake tainanga.

1 Buyambam tapa, nata tumuk wamu gae yawa natapso.
Gata gatangamiyakge natake gae yanggat taknga natangamuyo.
2 Siakan. Meya buyambamda nae apan kakengu
ga nae ma kusopuwim.
Sike nata tumuk wamu gae yawanu gata maak pake
natane wama natake zet gatangamuyo.
3 Dasingge, natane kayuk yutnanga aknga katap sawa kupan takngata enake mateknga yuke asopukaing binga.
Siwan natane gupma toknga katapaim binga. Katap yasiwan katapaimu toknga sikaingunin.
4 Siwan Anutu, ga nandutewi meya takngatu kakumu wa unzing, zongazongata akupiakaing binga sikum.
Siwan natane musipmaatangu nanamu natapnanga dua sikut.
5 Na meya natake nata kumzang siknga yanggamatanggat.
Siwan natane gupma suyuknga dua. Na kwatanakan tapata yuat.
6 Na wai siknga kwaiu taa gwenduta keu nanamna wena komune yuak binga nata yuat.
Yuke kwaiu zikaane sukunggau gwenduta binga ninatakan yuat.
7 Siwan na apekgat komune pewa ngana kaina petnanga dua singgak.
Butaya! Na ninatakan kwaiu gwenduta inatakan yot dum tangan yuak binga yuat.
8 Sike gunzit tapane gatu zikaane ngangu iwanata aminu kundu ayanisapdukaing.
Siwan waaminda masa wam yanike natane umana aknga yake Anututa na tasiwan meya pakum taknga tawake tasiwa waaminu meya paningge yakaing.
9 Nata muyuu nanama binga nake
kai yanggana puke kapmane yangga tangokgat gopatang pukuwa tangokgat.
10 Dasingge? Gata nae kaanga buyambam siknga natangamuke
na take samba samba binga mutewi kunggat.
11 Na kayuu dapaknga siknga yuat. Unzing gunzitda bangee pukunggak binga.
Siwan na zongazonga akupiakaingga binga yuat.
12 Siwan ngana, Buyambamtapa, ga king kapa asinggan yuayak.
Sike aminbamu masan aatningga gaenu atnatapning.
13 Sike tapduknga gata butaya natapnanga gwa singgak.
Ngan, apmanu butaya natapnanga tapduk.
Apmanu gata apuke Saion yotbam gapmae musip kwikwik natangamuke gatangamuyo.
14 Saion yotbam gapma you bumi wai gwa sikut. Siwan ngana gatane puya amindata you wa gapmatane samba sambae take siknga nataaing.
Apmanu wai gwa siwan ngana kupapongu ayuakge butaya siknga nataaing.
15 Aminu dongu kuupbamda Buyambam tapae akgwauke ie gepbiatang yutning.
Ngan, Buyambamtapa, kingu kuupbamu kepna kepna nanata gatane umanda kopsa siknga akngakae akgwautning.
16 Masande Anututa Saion yotbam gapma gatu tangenakengu
ita inane kekekngana aminu kuupbamde ayeuyamik.
17 Siwana inane aminabamda upeeke tumuk wamu iniwa ita maak papik.
Tupa waaminu sandepewan moo yuking ngana gatu ita waamindane tumuk wamnae masa dua yamik.
18 Nata nataau wamu takngatu buk gomune apmataningge nataat.
Ge bapuninu dongu masan aatningga wamu waakngae natake waaminda Buyambam tapatane umana ayatangenatningge nataat.
19 Wamu anzing mataning, “Buyambamtapa enane yuke amunandang kakut.
Ita yekaune yuke amuna kepdaka akakut.
20 Kake ita nataawan iwanata aminu kundu papa kaautde pewa yuke meya pakaingga kwanam siwa natapbut.
Natake ita waaminu kotda akumningge gwa yawan kekekakut ngana sandeyaman kepman pukuke dua kumning.”
21 Zaion nana aminda Buyambam tapatane umana yakapning.
Ngan, yakapmake Jerusalem nana waaminda gaak wamu ie inining.
22 Inike aminu kepna kepna nanaat gatu kingaat
Jerusalem yot gapmane unekan yuke Buyambam tapae munu putning.
23 Nata waatdaka kekekngaapa kayuk yuwawa Buyambam tapata kekekngana atasiwan maikut.
Unzingge nata kayuu mamaya yutnanga dua. Ita natane tapduknga dapaknga takepbut.
24 Dapaknga takepan kake nata anzing inikum,
“Anutuna, ga asinggan asinggan yuayak.
Gata apmanu na ma tapim. Na aminuake dua. Na kekekngaapa yuat.
25 Tupa siknga gata keu andaka tasike tekuyak.
Siwan gikane katakga ena kakaa komune sanga bamu une yuaingu gika siknga pasike pekuyak.
26 Ena kakaa kopat kepat wena siknga asisan.
Siwan ngana ga asinggan asinggan yuya.
Sanga waapaau taukga bumi sikaing binga sisan.
Siwan gata sanga waapaau kake aminda tauknga bumi siwa peke kayuk pasikaing binga gata sanga waapaau pasiwi gatukande sopuke gatu dua yutzan.
27 Sike ngana ga tendekga wena.
Asinggan asinggan yuke gae tapduu wena dua siwik.
28 Unzingge gata nindane waatdakaninu kakuya pasiwawi take yutning.
Yuke waakwakgane bapuna masan aatningu gata gatayami gaat waakwakat asinggan gatake yutning.”